فيصل والحركه العيالى

عيل اهطل غمزوه بقرشين وهو صايع الكترونات بالخبره يعنى لا مهندس ولا صنايعى

امكنه التحرش بيافطه الكترونيه ودخل عليها بكام صوره لرمز الدوله هو فاكر او اللى دفعواله وتوقعوا انه هب اول ما الناس حتشوف الوساخه اللى عاملها حيجروا على التحرير والهتاف المدوى ارحل ارحل …..

همه حيقولوا كده مهم سفله وهمه دول كام عيل صايع بجلابيه قصيره ولحيه مكنسه ومستحماش بقى له شهرين واكتر من ساعة طلعة رجب

..وكده يخلصوا من رمز مصر ويرجعوا فى الاتحاديه مش فى العاصمه الاداريه لا فى الاتحاديه مهى عقده بقى يفرشوا على الأرض والبط والمحاشى والرز بلبن والسواك علشان يصلوا الأول مع انهم مش متوضين

ياكلون ويكرعوا ويطلعوا اول بيان لدولة الحلاقه..لا اقصد الخلافه
كده مش ده المهم

المهم انه اكبر رؤساء العالم فى اكبر الدول بيتعمل فيهم من الاحزاب المعارضه قد كده مليون مره ولا بتتهز شعره واحده لرمز الدوله او الحكومه طالما ان الفعل كله خيبه وغباء وهطل ولا يمثل اى جرم تخريب او ضرر بحقوق المواطن او تدمير لممتلكات الدوله وبالتالي الشعب

لكم ايه اللى حصل هنا،؟؟
رد فعل مضطرب وتجييش المخبر السرى ومباحث الجيزه والعاصمه وطوارى كل أقسام الشرطه واجتماعات الهيئات العليا للداخليه وربما القوات المسلحه
ليه ياسيد ؟

ده كل اللى شافها من غير اخوان المسخره ضحك وفطس ضحك..واستهزأ باللى عملها وردد يابن الهبله انت فاكر ده اللى حيشيل السيسى ياغبى يامتخلف. ومشى وطلب أصحابه بالموبايل الاى فون مع انه مواطن عادى لكن عنده اى فون..تعالى اتفرج ولا اقول لك حصورها فيديو وابعتها لك متتعبش نفسك

ده رد الفعل الذى سيطر على الموقف جماهيريا لكن إعلاميا ورسميا لم يكن بتلك العقلانيه وإنما باعطاء الفعل شكل تراجيديا اغريقيه سوداء كئيبة الملامح..

تجعل من الفعل كارثه وهو ما تلقاه مطاريد الإخوان ببريطانيا وتركيا والدوحه وعملوا منه حفلة زار بقى لهم اسبوع ولسه

والله لو ترك الأمر بلا اى او أدنى اهتمام واعتباره واحده من مقالب ابراهبم نصر..نذيع ولا لا كان احلى وأفضل
نذيع ولا لا

ياريت يكرروها كل يوم جمعه وخلينا نضحك فى جو كئابة الاسعار اللى كيلو العنب ب ٤٥ ج والمنجه تبدأ من ٣٥ج اما البرقوق والخوخ والمشمش سعر موحد ٥٠ ج الكيلو
يافكهانيه…كلوه…خللوه
واحنا حنتفرج وناكل عسليه ماهو اللى بنى مصر كان فى الأصل حلوانى