ذباب التسويق العقارى
لا ادرى كيف يتسرب رقم موبايلى الى كل شركات التسويق العقارى لكى يحرمونى من الراحة
رن جري الموبايل
*الو مستر محسن ازى حضرتك
مين معايه
*أنا ماهيتاب..حضرتك مش فاكرنى
ولا عمرى سمعت اسمك ولا أعرف معناه
*مش معقول مستر محسن انا كلمت حضرتك من اسبوع
يمكن عموما مين حضرتك؟
*أنا ماهيتاب
تانى…….
*أنا من شركة تسويق اسكن ودكن
ماشى ..اتفضلى
*شوف حضرتك احنا عندنا كل اللى تطلبه
فى منيو؟
*لا لا احنا مش مطعم… حضرتك عندنا فى العاصمة الاداريه والشيخ زايد واكتوبر والتجمع ووووووو
كفايه كفايه
*حضرتك عايز سكن ولا تجارى
لا ده ولا ده
*يبقى عايز أرض بس دى مش تخصصنا
ولا دى
*عموما احنا عندنا
Apartment
Town house
Twin house
Villas stand alone
بس أنا نفسي فى حاجه تانيه
*متهيأ لى مستر محسن مفيش تانى الا القصور
لا لا قصور ايه يا عتاب
*ماهيتاب يا مستر محسن
آسف أنا عايز حاجه Stay Alone مش stand alone
*قصد حضرتك ايه….. ده تحرش ولا ايه
لا أنا مش بتاع كده يا رحاب
* ماهيتاب..يامستر…وضح لى الطلب والمساحه وممكن نجيب لحضرتك الطلب
المساحه 2 فى تلاته متر بس لازم تكون هواها كويس
*مش فاهمه؟
أنا محتاج لمدفن عين واحده فى مكان هادى وبالتقسيط
سمعت ڜتائم وردح.حوارى وقفلت فى وشى السكه وانا انادى…..ماهىتاب…. ياعتاب انت رحتى فين…عندكم الطلب ولا لا؟؟؟؟؟
واخيرا توصلت الى الطريقة التى تبعد عنى ذباب التسويق العقارى
