الكوكب و سنينه
صباح الخير….
و لو إنت مش عارف ومش فاهم اللي بيحصل ف الكوكب…..
و لو إنتي مش عارفة ولا فاهمة اللي بيحصل ف الكوكب…
ف خليني أقولكوا ومطولش عليكوا وقولولي طول…..
شوف يا سيدي …الكوكب كله فيه تلات حروب او كوارث ممكن يقلبوا الكوكب كله ف لحظة لو حصلت منهم حرب واحدة هتقوم ساعتها الحرب العالمية التالتة….
١- اول حرب لو حصلت هتقوم حرب عالمية تالتة فورا هي لو الصين هبأت على تايوان وضمتها رسميا ساعتها العالم كله هيطحن في بعضه والعالم هيتقسم نصين
نص مع الصين ومعاها روسيا ونص مع امريكا ومعاها اوروبا….
و الصين هتعمل كدا فعلا بس مستنية دورة الالعاب الأولمبية الشتوية تخلص…
٢- تاني حرب لو حصلت هتقوم حرب عالمية تالته فورا هي لو روسيا هبأت على اوكرانيا وضمتها رسميا ساعتها العالم كله هيطحن فبعضه وهيتقسم نصين نص مع روسيا ومعاها الصين ونص مع امريكا ومعاها اوروبا…
بس روسيا ممكن متضمش اوكرانيا وتفكس للموضوع بشرط ان اوكرانيا ما تنضمش للاتحاد الاوروبي ولا تنضم لحلف الناتو
٣- تالت حرب لو حصلت ممكن تقلب الكوكب كله لحرب عالمية تالته هي لو إسرائيل هبأت على إيران وضربت مفاعلاتها النوويه
اصلا إيران بتجهز جيش كامل شغلته هي إجتياح إسرائيل في حالة ضربها لإيران علشان كدا هي بتمول و حاطه حرس ثوري فسوريا وحزب الله ف لبنان وحماس ف غزة …
والكوكب كله هيتقسم نصين …
نص مع ايران وف ضهرها الصين وروسيا ونص مع إسرائيل وف ضهرها امريكا واوروبا …
بس لحد دلوقتي في امل ان إيران تيجي ف آخر لحظة وتوقع على الإتفاق النووي وتلم الليلة…
بس امريكا وإسرائيل عاملين مناورات عسكرية تدريبية بقالهم يومين على إقتحام إيران….!!
و دول الخليج خلاص يادوب فهموا اللعبة والإمارات بتحاول بكل ما تملك ان ميحصلش حرب فمنطقة الخليج حتى ولو تهويش ووزير خارجيتها راح لحد إيران
المفاجاة بقى ان السعودية امبارح خفضت الإنفاق العسكري ف الموازنة العامة والامريكان كل يوم في وفد هناك علشان يزودوا انتاج البترول ويقللوا السعر والسعودية بترفض ف مفيش حل قدام الامريكان غير انهم يا يضربوا ايران ويعملوا نفس فيلم العراق ويمصوا انتاجها من البترول تحت مسمى منع إيران من إمتلاك قنبلة نووية يا اما إيران ترضخ وتديهم البترول ببلاش تحت مسمى الاتفاق النووي
انما هو ف الاصل حرب طاقة
ومحدش عارف الدنيا هتولع فين الاول…
وع الناحية التانية من الكوكب……العراق….
إقليم كردستان ف العراق وعاصمتة إربيل عاملين هناك خناقه كبيرة و بيشتكوا ان العاصمة بغداد منعت عنهم البنزين والسولار وإنهم اكبر إقليم بيتم استخراج البترول منه ف العراق وانهم كدا مش واخدين حقهم …… طبعا كدا نفهم إيه !!
نفهم ان اربيل بتفكر تنفصل تماما عن العراق رغم انها واخده حكم ذاتي وليها حكومتها وجيشها وشرطتها ورئيس اقليمها كمان بس عايزين يبقوا دولة كردية ….
وع الناحية التانية من الكوكب….لبنان…
النهاردة الصبح…… وعلى ريق النوم يعني ولا عملنا بحسنة ولا سيىة كدا…
الدولار بقا ب ٢٦ الف ليرة …!!
يعني حضرتك لو معاك دولار واحد ف انت كدا معاك ٢٦ الف….. ياااخونا ٢٦ الف وربنا يكون ف عونهم
وع الناحية التانية من الكوكب…..
تركيا…..
الناس صحيت برضوا النهاردة ف تركيا وعلى ريق النوم كدا وقبل ما يشقوا ريقهم بحاجه لقيوا الدولار نط وبقا ب ١٤.٤٨ وبيقرب من ال١٥ ليرة ..
يسكت أردوغان …. ابدا !!!
راح رافع سعر البنزين والسولار ورفع سعر رغيف العيش ع الصبح.
خد بالك ان دا السعر المعلن من الحكومة انما فسوق السودة …. يختاااي معدي ال ٢٣ ليرة ومقرب من ال٢٥
وع الناحية التانية من الكوكب….أمريكا…..
أعاصير بتجتاح ولاية كنتاكي ولحد دلوقتي نص الولاية اتدمر تماما وفي حوالي ١٠٠ امريكي ماتوا بسبب الاعاصير دي
ومعمول لسكان الولاية خيم إيواء…..
إيه ياعم التهريج ده … هما الامريكان بجلالة قدرهم هيقعدوا في خيم ايواء زي بتاعة الزلزال!!!
ياعم والله قاعدين في خيم ايواء ف الحدائق العامة ولو مش مصدقني اعمل سيرش على ولاية كنتاكي المنكوبة…
والحكومة الفيدرالية مش عارفة توصلهم
وطلع بايدن وقال احنا ف مصيبة و ان ولاية كنتاكي منكوبة وبنحاول نوصل لناسنا واهالينا هناك بس امر الله ونفد…
وع الناحية التانية من الكوكب…..إندونسيا….
إندونسيا بتحذر شعبها من موجات تسونامي ممكن تدمر نص البلد بعد ما جه زلزال بقوة ٧ ريختر ….. وربنا يستر بقا ع الكوكب
وع الناحية التانية من الكوكب…..تونس…
قيس سعيد رئيس تونس طلع قرار بتجميد البرلمان تماما لحين عمل إنتخابات…
يعني باي باي برلمان الإخوان السابق ف تونس…
وع الناحية التانية من الكوكب…اثيوبيا….
قوات التيجراي ف اثيوبيا هبأت على قوات الموهوم آبي احمد واخدت منهم اسلحة وعتاد عسكري وبيقولوا انهم اخدوا احدث اسلحة لديه..
وهنفضل بقا ف الحدوتة دي ييجي كمان عشر سنين زي اي دولة فوسط القرن الافريقي دول يهبأوا على دول شوية ودول يسنجوا دول شوية واللي هيصحى الصبح قبل التاني هيثبته ويقلبه كمان فشوية أسلحة …
يعني لا في دولة ولا في جيش وكمان الامم المتحدة وقفت المعونات الغذائية يعني الغرب بيقول للشعب الاثيوبي يا تخلع ابي احمد يا هتموت من الجوع…
كمان صور الاقمار الصناعية بتقول ان في حرائق رهيبة حوالين السد ومحدش عارف إيه سببها ولا حد عارف يطفيها ولا حد عارف حاجه علشان مفيش نت ف اثيوبيا ولا في اتصالات ومحدش قادر يجزم ايه اللي بيحصل بالظبط هناك وكل المعلومات اللي بتيجي من هناك يا إما على لسان الموهوم يا إما على لسان التيجراي…
وع الناحية التانية من الكوكب…… كوكب تحيا مصرمن يومين كدا الدنيا قامت ومقعدتش ف كوكب تحيا مصر بسب قال إيه تسريبات لنظام السيسي…
ربكوا والحق انا اول ما قالولي عبدالله الشريف بيذيع تسريبات …
منغير ما اسمعها قولت هو في حد لسه بيسمع للخاين ده
هو صحيح فطرته سليمه ومقضيها شقط . انما في حد يصدق واحد خاين!!
وسألت نفسي واللي حواليا سؤال واحد…
هو عبدالله الشريف جامد اوي كدا وقادر يوصل للتسريبات يعني هو أجمد من المخابرات المصرية اللي مدوخة العالم كله ومتصنفه انها من اقوى اجهزة المخابرات العالمية !!
طب بلاش دي
طب هو اجمد من امن الدولة المصري اللي قدر يقضي على جماعة الإخوان فكل العالم !!
مفيش يا مؤمن هما ٤٨ ساعة يادوب وأمن الدولة جاب شوية النصابين دول وجاب كمان كل الرسايل اللي على واتس عبدالله نفسه….
هما الناس دول نسيوا ان مصر سجلت اجتماعتهم اصلا من قلب مكتب اردوغان !!
وكانت فضيحة لاردوغان وغير فيها طقم الامن كله!!
وف كوكب تحيا مصر …..
الدنيا مقلوبة حرفيا ف الصحافة الإسرائيلية وف إسرائيل كلها لسببين..
أول سبب إن وزير خارجية إسرائيل طلب انه يجتمع بالسيسي وراح قابله فشرم الشيخ و أطلعه على آخر التطورات السياسية وخطة اسرائيل لضرب ايران
ف الصحافة الإسرائيلية بقا…. هاجت وقالت هو جه الوقت على إسرائيل انها تستاذن مصر قبل اي تحرك !!!!
كمان الصحافة الاسرائيلية نشرت صورة للسيسي ووزير الخارجية الاسرائيلي ومفيش علم لإسرائيل جنب العلم المصري
وقالت كمان كون ان السيسي يجتمع بوزير الخارجية يبقى كدا خلاص رئيس الوزراء القادم لإسرائيل هو وزير الخارجية يائير لابيد
طلع بقى المحروس يائير وعمل مؤتمر صحفي لما لقى الموضوع سخن في الصحافة وكبر وقال بالحرف كدا …
مصر دولة عظمى ف الشرق الاوسط ويجب إطلاعها على كل المستجدات ف المنطقة وعلى اي تحركات تخص المنطقة …
بالبلدي كدا يعني المنطقة بقا ليها كبير
أما بالنسبة لعدم وضع علم إسرائيل بجوار العلم المصري فدا بروتوكول دبلوماسي لو رئيس مع رئيس بيتحط العلمين انما رئيس مع وزير خارجية بيتحط علم دولة الرئيس
وخلص على كدا المؤتمر….
خد بالك في حاجة كبيرة هتحصل ف المنطقة الفترة اللي جاية …
طول عمر وزير الخارجية الإسرائيلي بيقابل وزير الخارجية المصري عادي والسيسي عمره ما اجتمع مع وزير خارجية اسرائيل ودا اللي مجنن الدنيا ف الصحافة هناك ودا اللي مخليهم متاكدين ان الموضوع سري للغاية و دا اللي خلاهم يقولوا ان دا معناه ان يائير هيكون رئيس وزراء اسرائيل القادم…..
كمان الصحافة الإسرائيلية علقت على الإحتفالات الفرعونية العالمية زي نقل الممياوات وطريق الكباش وإهتمام الدولة المصرية بالحضارة الفرعونية وخصوصا إهتمام السيسي بكدا وحضورة الشخصي فيها…
ف بتقول إن دي رسالة من السيسي للعالم كله انه عايز يرجع أمجاد وعظمة الملوك القدماء المصريين…. آه والله قالوا كدا
ف لو انت لحد دلولقتي مش مصدق ولا قادر تستوعب ان مصر بقت هي الدولة العظمى ف المنطقة وهي اللي بتحدد سياسات الدول ف منطقة الشرق الاوسط وافريقيا ومصدق عبدالله ترتر….. يبقا عندك مشاكل نفسية و ضروري تعرض نفسك على دكتور نفساني
تقعدوا بالعافية….
